Namo Shetkari Yojana hafta : तुम्ही जर नमो शेतकरी सन्मान निधी योजनेचे (Namo Shetkari Sanman Nidhi Yojana) लाभार्थी असाल, तर तुमच्यासाठी एक महत्त्वाची माहिती समोर आली आहे. नमो शेतकरी योजना, जी केंद्र सरकारच्या पीएम किसान योजनेच्या धर्तीवर राबवली जाते, तिच्या वार्षिक हप्त्यामध्ये वाढ होण्याची शक्यता आहे. या योजनेअंतर्गत शेतकऱ्यांना वर्षाला ₹६,००० ऐवजी ₹९,००० मिळतील, अशी माहिती राज्याचे मुख्यमंत्री देवेंद्र फडणवीस यांनी दिली होती.
वाढीव हप्ता आणि सध्याची स्थिती काय आहे?
मुख्यमंत्री देवेंद्र फडणवीस यांनी खरीप हंगाम २०२५ सुरू होण्यापूर्वी शेतकऱ्यांच्या खात्यावर पुढील हप्ता जमा होईल असे आश्वासन दिले होते. मात्र, या निधीसाठी आवश्यक असलेल्या ₹३,००० कोटी रुपयांची तरतूद अद्याप झालेली नसल्यामुळे हप्ता जमा होण्यास अडचणी येत आहेत.
सध्या ‘नमो शेतकरी’ आणि ‘पीएम किसान’ या दोन्ही योजनांसाठी ‘ॲग्रीस्टॉक’ (शेतकरी ओळखपत्र) क्रमांक बंधनकारक करण्यात आला आहे, परंतु नमो शेतकरी योजनेसाठी याबाबत कोणतीही अधिकृत अधिसूचना जारी झालेली नाही. त्यामुळे केवळ ओळख क्रमांक असलेल्या शेतकऱ्यांनाच लाभ मिळेल की नाही, याबाबत अजूनही संभ्रम आहे.
सातवा हप्ता कधी मिळणार?
नमो शेतकरी सन्मान निधी योजनेच्या सातव्या हप्त्यासाठी राज्यातील एकूण ९३ लाख शेतकरी पात्र ठरले आहेत. अनेक शेतकऱ्यांनी बियाणे आणि खतांच्या खरेदीसाठी या हप्त्याची वाट पाहिली होती. राज्य सरकारवर ‘मुख्यमंत्री माझी लाडकी बहीण योजने’मुळे आर्थिक भार वाढला असल्यामुळे इतर योजनांवर त्याचा परिणाम दिसून येत आहे. तरीही, शेतकऱ्यांना लवकरच सातवा हप्ता मिळेल अशी अपेक्षा आहे.
कृषी विभागाने शेतकऱ्यांना त्यांचे ‘ॲग्रीस्टॉक’ ओळखपत्र काढून घेण्याचे आवाहन केले आहे, कारण भविष्यात केवळ ओळखपत्र असलेल्या शेतकऱ्यांनाच या योजनेचा लाभ मिळू शकतो. मुख्यमंत्र्यांच्या घोषणेनुसार वाढीव रक्कम मिळणार की नाही, याकडे राज्यातील सर्व शेतकऱ्यांचे लक्ष लागले आहे.
