केंद्र सरकार आणि एलआयसीने महिलांना आर्थिकदृष्ट्या आत्मनिर्भर बनवण्यासाठी एक खास योजना सुरू केली आहे. ‘एलआयसी विमा सखी योजना’ (LIC Vima Sakhi Yojana) असे या योजनेचे नाव आहे. या योजनेत महिलांना केवळ आर्थिक मदतच नाही, तर त्यांना स्वतःचा व्यवसाय सुरू करण्याची संधीही दिली जाते.
‘विमा सखी’ योजना म्हणजे काय?
ग्रामीण आणि निम-शहरी भागांतील महिलांना आर्थिक साक्षरता देऊन त्यांना विमा एजंट म्हणून काम करण्यासाठी प्रशिक्षण देणे, हा या योजनेचा मुख्य उद्देश आहे. या प्रशिक्षणादरम्यान, महिलांना विमा आणि आर्थिक साक्षरतेबद्दल शिकवले जाते.
या प्रशिक्षणादरम्यानच पात्र महिलांना दरमहा ₹५,००० ते ₹७,००० ची आर्थिक मदत (स्टायपेंड) दिली जाते. प्रशिक्षण पूर्ण झाल्यावर, त्यांना ‘विमा सखी’ प्रमाणपत्र आणि एलआयसी एजंटचा कोड दिला जातो.
कमाईची संधी आणि इतर फायदे
प्रशिक्षण पूर्ण झाल्यानंतर, महिला एलआयसी एजंट म्हणून काम सुरू करू शकतात.
- कमिशन आणि इन्सेंटिव्ह: विमा पॉलिसी विकून त्या कमिशन आणि इतर इन्सेंटिव्हच्या माध्यमातून चांगली कमाई करू शकतात.
- अतिरिक्त कमाई: या योजनेत पहिल्या वर्षात ₹४८,००० पर्यंतची अतिरिक्त कमाई करण्याची संधी मिळते.
- उद्दिष्ट: सरकारचे उद्दिष्ट देशातील १ लाख महिलांना ‘विमा सखी’ बनवणे आहे.
या योजनेसाठी कोण अर्ज करू शकते?
- महिलांसाठी: फक्त महिला उमेदवार या योजनेसाठी अर्ज करू शकतात.
- वयोमर्यादा: १८ ते ७० वयोगटातील महिला अर्ज करण्यास पात्र आहेत.
- शैक्षणिक पात्रता: अर्जदार किमान १०वी पास असणे आवश्यक आहे.
अर्ज प्रक्रिया
अर्ज करण्यासाठी तुम्ही एलआयसीच्या अधिकृत वेबसाइटला भेट देऊ शकता किंवा जवळच्या सीएससी (CSC) केंद्रावर जाऊन अर्ज भरू शकता. ही योजना महिलांना केवळ आर्थिक मदतच देत नाही, तर त्यांना सन्मानाने स्वतःच्या पायावर उभे राहण्यासाठी एक उत्तम संधी उपलब्ध करून देत आहे.
