Tur Rate: आजपासून सप्टेंबर महिना सुरू झाला आहे. सध्या बाजारात तुरीच्या किमती (Tur Market) मागील वर्षाच्या तुलनेत कमी झाल्या आहेत. नोव्हेंबर २०२४ पासून तुरीच्या दरात सातत्याने घट दिसून येत आहे. या महिन्यात तुरीचे दर कसे असतील, याबद्दलची माहिती आम्ही तुमच्यासाठी घेऊन आलो आहोत.
मागील वर्षांच्या तुलनेत काय बदल?
- किमान आधारभूत किंमत (MSP): केंद्र सरकारने खरीप हंगाम २०२५-२६ साठी तुरीची किमान आधारभूत किंमत ८ हजार रुपये प्रति क्विंटल जाहीर केली आहे, मात्र सध्याचे बाजारभाव त्यापेक्षा कमी आहेत.
- आयात आणि निर्यात: गेल्या वर्षीच्या (२०२३-२४) तुलनेत या वर्षी (२०२४-२५) तुरीची आयात वाढली असून, निर्यात कमी झाली आहे.
- उत्पादन वाढ: नवीन अंदाजानुसार, २०२४-२५ मध्ये तुरीचे उत्पादन सुमारे ३५.६१ लाख टन होण्याची शक्यता आहे. हे गेल्या वर्षीच्या तुलनेत जास्त आहे. महाराष्ट्रातही २०२४-२५ मध्ये १३.३ लाख टन उत्पादन होण्याचा अंदाज आहे, जे मागील वर्षी १०.१० लाख टन होते.
सप्टेंबर महिन्यातील संभाव्य दर
मागील तीन वर्षांतील सप्टेंबरमधील सरासरी बाजारभाव पाहिल्यास दर खालीलप्रमाणे होते:
- सप्टेंबर २०२२: ७,३१४ रुपये प्रति क्विंटल
- सप्टेंबर २०२३: १०,५०० रुपये प्रति क्विंटल
- सप्टेंबर २०२४: १०,११९ रुपये प्रति क्विंटल
या सर्व गोष्टींचा विचार करून, बाळासाहेब ठाकरे कृषी व्यवसाय व ग्रामीण परिवर्तन (स्मार्ट) प्रकल्पाने वर्तवलेल्या सुधारित अंदाजानुसार, सप्टेंबर २०२५ मध्ये तुरीचा संभाव्य भाव ६,४३५ ते ६,७५० रुपये प्रति क्विंटल राहण्याची शक्यता आहे. हा अंदाज FAQ (Fair Average Quality) ग्रेडच्या तुरीसाठी आहे.
तूर हे खरीप पीक असल्यामुळे त्याची पेरणी जून-जुलैमध्ये होते आणि काढणी डिसेंबर ते फेब्रुवारी या काळात होते. त्यामुळे, बाजारात तुरीची प्रमुख आवक याच काळात होते. या वर्षी ऑगस्टमध्ये तुरीची आवक मागील वर्षाच्या तुलनेत वाढलेली असून त्यात थोडी घट दिसून येत आहे.
